علم العفا وعفاك ياوافي الكيل
بساطة أبشرك في خير وعف
نكفي بعضنا وانتكافا على الشيل
والي تعب من الحط والشيل يكفا
من ذاق حر القايلة يعشق الليل
ومن شب ضوه ليلة البرد يدفا
لاعاد ليل ٍنمت به حري سهيل
وخايل نوض ٍيخطف العين خطفا
أمسيت في جيل ٍولاهوب ذا جيل
وأصبحت ولاديرتي شبه منفا
كنا على فال الشحم والمعاميل
ونفوسنا أنقى من نقى العد واصفا
وأنا ولو راحت بقولة تساهيل
صلف وصروف الوقت تحتاج صلفا
ياترج جداني زحول الرجاجيل
يحرم فلا لي عنك ياترج مقفا
إما لطمنا العيل ولا ألطم العيل
مادام شب النار مندوب لطفا
خل أبرهه الأشرم على ذمة الفيل
وانظر لظلم مايوصفه وصفا
ياذيل والله ماتجي راس ياذيل
علم ٍماهو يغبى ولاهوب يخفا
واللي حما بيته بطير ٍأبابيل
من جيتك دور لمن راح وقفا
لا جيت أطلب منك بن ٍولا هيل
جيتك وجرح الظلم غاديه يشفا
جيتك بكلمه كنها صعقة الويل
ان قلت تكفا لاتهاون بتكفا